قصيدة :يا شعبى حبيبى للشاعر / احمد فؤاد نجم

ياشعبي حبيبي ياروحي يابيبي <> ياحاطك في جيبي يابن الحلال

ياشعبي ياشاطر ياجابر خواطر <> يا ساكن مقابر وصابر وعال

يا واكل سمومك يا بايع هدومك <> يا حامل همومك وشايل جبال

ياشعبي اللي نايم وسارح وهايم <> وفي الفقر عايم وحاله ده حال

احبك محشش مفرفش مطنش <> ودايخ مدروخ واخر انسطال

احبك مكبر دماغك مخدر <> ممشي امورك كده باتكال

واحب اللي ينصب واحب اللي يكذب <> واحب اللي ينهب ويسرق تلال

واحب اللي شايف وعارف <> وبالع لسانه وكاتم ماقال

واحب اللي راضي واحب اللي فاضي <> واحب اللي عايز يربي العيال

واحب اللي يائس واحب اللي بائس <> واحب اللي محبط وشايف محال

واحبك تسافر وتبعد تهاجر <> وتبعت فلوسك دولارأو ريال

واحبك تطبل تهلل تهبل <> عشان ماتش كوره وفيلم ومقال

واحبك تأيد تعضد تمجد <> توافق تنافق وتلحس نعال

تحضر نشادر تجمع كوادر <> تلمع تقمع تضبط مجال

لكن لو تفكر تخطط تقرر <> تشغلي مخك وتفتح جدال

وتبدأ تشاكل وتعمل مشاكل <> وتنكش مسائل وتسأل سؤال

وعايز تنور وعايز تطور <> وتعمللي روحك مفرد رجال

ساعتها حجيبك لايمكن اسيبك <> وراح تبقى عبره وتصبح مثال

هبهدل جنابك واذل اللي جابك <> وهيكون عذابك ده فوق الاحتمال

وامرمط سعادتك واهزأ سيادتك <> واخلي كرامتك في حالة هزال

وتلبس قضيه وتصبح رزيه <> وباقي حياتك تعيش في انعزال

هتقبل هحبك هترفض هلبك <>هتطلع هتنزل هجيبلك جمااااال

الشاعر: أحمد فؤاد نجم